Türkiýe Respublikasynyň Prezidenti Rejep Taýyp Ärdogan Türkmenistanyň Prezidentine hem-de türkmen halkynyň Milli Liderine sowgat hökmünde «TOGG» kysymly elektrik awtoulaglaryny iberdi.
Türkmenistanda ilkinji «akylly» şäher bolan Arkadag şäheriniň açylyş dabarasyna gatnaşmak üçin gelen Türkiýe Respublikasynyň senagat we tehnologiýalar ministri Mehmet Fatih Kajyry hem-de Türkiýe Respublikasynyň Palatalar we biržalar birleşiginiň başlygy Rifat Hisarjyklyoglu Rejep Taýyp Ärdoganyň adyndan «TOGG» kysymly elektrik awtoulaglaryň açarlaryny Türkmenistanyň Prezidentine uly hormat bilen gowşurdylar.
«TOGG» kysymly awtoulaglaryň köpçülikleýin önümçilik zawody Prezident Rejep Taýyp Ärdoganyň gatnaşmagynda 2022-nji ýylyň 29-njy oktýabrynda açyldy. Ýeri gelende bellesek, elektrik awtoulaglaryň her ýyl 177 müňüsi öndüriler. 2030-njy ýyla çenli önümçilik kuwwaty 1 milliona ýetiriler. Awtoulaglar 2 görnüşde – 200 we 400 at güýjünde çykarylýar. Onuň iň kuwwatlysy 4,8 sekuntda sagatda 100 kilometrlik tizlige ýetip bilýär. Awtoulag bir gezeklik zarýad bilen 500 kilometr menzil geçip bilýär.