Sebitde deňi-taýy bolmadyk Arkadag şäherindäki binalaryň aňrybaş amatly, «akylly» gurluşlara eýe bolmagy olaryň tapawutly aýratynlygydyr. Biri-birinden owadan binalar göreniň gözüni egleýär. Şolaryň biri-de Arkadag şäheriniň Gurluşyk toplumynyň binasydyr.

Arkadag şäheriniň Gurluşyk toplumy Mälikguly Berdimuhamedow şaýolunyň ugrunda ýerleşýär. Degresi gül-gunça, ýaşyl baglara beslenen binanyň merkezi dört gatdan ybarat bolup, iki gapdal tarapy iki gat görnüşinde bina edilendir. Şäheriň abadançylygy, ýaşaýjylaryň amatly şertlerde ýaşamagy üçin hyzmat edýän edara-kärhanalardan «Türkmenenergo» döwlet elektroenergetika korporasiýasynyň «Arkadagenergo» önümçilik birleşigi, «Döwletenergogözegçilik» kärhanasynyň Arkadag şäheriniň müdirligi, «Arkadagenergo» önümçilik birleşiginiň Arkadag şäheriniň Yşyklandyryş müdirligi, Arkadag şäheriniň Jemagat hojalygy müdirligi, Arkadag şäheriniň häkimliginiň Tehniki tükelleýiş edarasy hem-de Arkadag şäheriniň häkimliginiň Ýaşaýyş jaýlaryny hasaba alyş, paýlaýyş we resmileşdiriş müdirligi bu binada işlerini alyp barýarlar.

Arkadag şäheriniň häkimliginiň Jemagat hojalygy müdirligi birinji gatda ýerleşmek bilen, şäheriň arassaçylygy bilen bagly işleri, olaryň gurmaçylygy, ýerine ýetirilişi barada degerli işleri alyp barýar. Bu edaranyň şäherdäki giň şaýollar, köçeler, ýanýodalar, geçelgeler, şäheriň agyz suw we lagym suw ulgamlarynyň sazlaşykly işinde mynasyp paýy bar. Müdirlige ýene-de yşyklandyryş, ýyladyş-sowadyş ulgamlary, ýol-ulag bölümi hem degişlidir.

«Döwletenergogözegçilik» kärhanasynyň Arkadag şäheriniň müdirligi birinji gatdaky edaralaryň ýene biri. Müdirlik sarp edilýän elektrik togunyň howpsuz ulanylyşy, sarp edilişi we tölegleriniň hasaplanylyşy boýunça gözegçilikleri ýerine ýetirýär. «Akylly» şähere muwapyk tilsimçeler arkaly edara we ýaşaýyş jaýlarynyň howpsuzlygyna hem gözegçilik edýär.

Gurluşyk toplumynyň 2-nji gaty tutuşlygyna «Arkadagşäherenergo» önümçilik birleşigine degişli. Şäheriň ähli energo ulgamyna degişli obýektlerine we işleriň kadaly alnyp barylmagyna gözegçilik edýär. Şäheriň energogözegçiliginiň alnyp barlyşy, ýagtylandyrylyşy we yşyklandyrylyşy bilen bagly işlerde degişli edaradyr.

«Akylly» şäheriň döwrebap binasynda zähmet çekýän hünärmenleriň ählisi işlerini döwrüň talabyna laýyk alyp barýarlar. Onuň üçin ähli mümkinçilikler döredilen. Olar şeýle şertlerde zähmet çekmäge döredilen mümkinçilikler üçin türkmen halkynyň Milli Lideri Gahryman Arkadagymyza, Arkadagly Gahryman Serdarymyza tüýs ýürekden alkyş aýdýarlar.