Watanymyň säherleri owadan.
Aýdan aýdyň şäherleri owadan.

Bir tarapy sähra, bir tarapy dag,
Guruldy ajaýyp şäher — Arkadag.

Dört pasyl gül-gunça ýazyň mekany.
Joşgunly aýdymyň-sazyň mekany.

Täze durmuş, ykballaryň gözbaşy,
Zehinleriň, ykrarlaryň gözbaşy.

Nusgalyk mukamy, menzil-rowany,
Arka-arka ussatlaryň dowamy.

Nur çaýylan gije-gündizlerine,
Halk guwanýar parlak ýyldyzlaryna.

Aýňalar gözellik nuruna teşne,
Bagt tapar ir säher senasyn eşden.

Heser düşer labyzyňa, heňiňe,
Ýeter ruhuň ho:l daglaryň deňine.

Bakarsyň kalbyňa synlap aklygyn,
Bilersiň mertebäň niçik zatdygyn.

Söýgiň lowlaberer ata Watana,
Janyňa jan, şanyňa şan gatana.

Ogullary gerçek, gyzlary peri,
Arzuw-umytlaryň gülleýän ýeri.

Dost-ýaryňa hödür edilsin nanyň,
Goý, mydama tämiz bolsun asmanyň!

* * *

Arkadagyň eseri

Gowy zatlaň gözleginde, gowy zatlara teşne,
Bu ýüregim aram tapdy, bakyp ajaýyp keşbe,
Gadymy Ahal topragyn, bezäpdir ajap keşde,
Söýgüden bina bolan baky bagtyň bahary,
Arkadagyň eseri — gözel Arkadag şäheri.

«Akylly» binalaryň mynasypdyr tarypa,
Adyň altyn harplar bilen ýazylmyşdyr taryha,
Şanyňa aýdyljak sözler sygmaz müň bir taglyma,
Göwnüň heýjana gelip, ýatladýar älemgoşary,
Arkadagyň eseri — gözel Arkadag şäheri.

«Ak zat alnyňa ýagşy» atalaryň sözi bardyr,
Görenler görküňe aşyk, görmedik saňa zardyr,
Arassa tämiz howa jana mydam tenekardyr,
Köpetdagyň eteginde sergin-saba säheri,
Arkadagyň eseri — gözel Arkadag şäheri.

Gözellikden birkemsiz ýetipdir-le paýyň seň,
Ýer ýüzünde, megerem, ýokdur asla taýyň seň,
Älem-jahana ýaň salsyn, şöhratyň seň, şanyň seň,
Şahyrlar waspyň aýdyp, dilde dessan edeni,
Arkadagyň eseri — gözel Arkadag şäheri.