Pasly-bahar güle çümen çaglary,
Joş uranda sähra-düzi, daglary,
Göwün at üstünde ganat baglady,
Seýle çykyp alys ýollara, bedew!

Kändir bu jahanyň sapa-seýrany,
Gözel göwnüm — gül Diýaryň haýrany.
Türkmeniň döwletli döwri-döwrany,
Ýyldyrym ýetdirmez ýellere, bedew!

Baýlyk kändir asman-zemin arada,
Ýöne saňa taý geljek zat nirede?
Dünýä halklaryny dosty-ýar eden
Bir belent ykbal sen illere, bedew!

Beýik Ýüpek ýolun besläp bahara,
Ýol uzar Amuldan bahry-Hazara,
Kämil owaz, dünýä dolan dabara,
Gül keşbiň ýaraşar güllere, bedew!

Ýerde ýörän, gökde uçan tagtym sen,
Syrdaşym sen, myradym sen, bagtym sen,
Ýüregimde ebedilik aýdym sen,
Waspyň sena boldy dillere, bedew!

Guwanjymyz, şöhratymyz, şanymyz —
Watandyr gursakda şirin janymyz,
Ilime bagyş edip buýsanç baýlygyn,
Ýol açar sen ýyldan-ýyllara, bedew!

Gurbanguly BERDIMUHAMEDOW