«Akylly» şäherde ýerleşýän binalardyr desgalar özüniň ýokary hilliligi, tehnologiýa taýdan kämil enjamlaşdyrylyşy, sanly hyzmatlary we mümkinçilikleri, döwrebap şertleri bilen tapawutlanýar. Şäheriň şeýle binalarynyň biri-de Arkadag şäheriniň Polisiýa müdirliginiň edara binasydyr.

Bina 3 gatdan ybarat bolmak bilen, iş otaglary, mejlisler zaly, muzeý, Galkynyş otagy, kitaphana, naharhana we işgärler üçin goşmaça otaglardan ybarat. Ýurdumyzda durmuşa geçirilýän sagdyn durmuş ýörelgelerinden ugur alnyp, bu ýerde sport bilen meşgullanmak üçin sport desgasynyň hem bolmagy örän buýsandyryjydyr. Onda basketbol, woleýbol, türgenleşik zallary hem-de daşky futbol meýdançasy bar. Asudalygy goraýjylaryň boş wagtlaryny medeniýetli geçirmekleri, dynç almaklary, saglyklaryny berkitmekleri, beden taýdan kuwwatlanmagy üçin ähli zerur şertler döredilendir.

Arkadag şäherinde Içeri işler ministrligine degişli bolan gulluklaryň ählisi täze döredilen «123» gullugy bilen sazlaşykly hereket edýär. Bu gulluk ilkinji gezek Arkadag şäherinde işe girizilen täze ulgamdyr. Onuň kömegi bilen, adatdan daşary ýagdaýlarda polisiýa gullugyny we beýleki dessin gulluklary kömege çagyryp bolýar. «123» gullugy zerur halatlarda gerekli kömegi bermäge we öňüni alyş çärelerini geçirmäge gönükdirilen bir bitewi ulgamdyr.

Arkadag şäheriniň Polisiýa müdirligine berlen «Volkswagen ID. 4 X Pro» kysymly ýörite elektromobiller gündelik işiň aýrylmaz bölegidir. Bu ulaglar ekologiýa taýdan arassalygy bilen daşky gurşawa zyýansyz bolup, onuň maddy-tehniki üpjünçiligi we mümkinçilikleri döwrüň ösen talaplaryndan ugur alýar. Mundan başga-da, «akylly» şäheriň Polisiýa müdirliginiň edara binasynda ýöriteleşdirilen bölümler boýunça degişli enjamlaryň, döwrebap kompýuterleriň, tehnologik tilsimatlaryň ornaşdyrylmagy işiň ýokary derejede guralmagyny üpjün edýär. Ilata ýokary hilli hyzmat etmekden, jemgyýetde asudalygy gorap saklamakdan ugur alyp zähmet çekýän hukuk goraýjy işgärleriň ata Watanymyza, Gahryman Arkadagymyza, Arkadagly Gahryman Serdarymyza wepaly gulluk etmegi üçin döredilen mümkinçilikler işleriň netijeli we ýokary hilli bolmagyny şertlendirýär.