Oňa Beýik Britaniýadan, Hindistandan, Eýrandan, Iordaniýadan, Gazagystandan, Malaýziýadan, Birleşen Arap Emirliklerinden, Pakistandan, Täjigistandan, Türkiýeden, Özbegistandan we Türkmenistandan türgenler gatnaşýarlar. 11-nji noýabrda badalga berlen halkara ýaryşyň açylyş dabarasynyň türkmen halkynyň Milli Lideri Gurbanguly Berdimuhamedowyň başlangyjy bilen gurlan 4 müň orunlyk Tennis toplumynda ýaýbaňlandyrylmagy mynasybetli köp sanly tomaşaçylar ýygnandy. Halkara ýaryşyň resmi açylyş dabarasynda hormatly Prezidentimiz Serdar Berdimuhamedowyň Gutlagy okaldy.

Dabarada Halkara Tennis federasiýasynyň wekili, tennis boýunça «Ashgabat Open 2024» halkara ýaryşynyň baş emini Mahdi Malekzade çykyş edip, türkmen tarapynyň ýaryşlary geçirmek üçin iň amatly şertleri döredendigini, şol sanda ajaýyp sport desgalaryny gurandygyny belläp, myhman tennisi ösdürmäge berýän goldawlary üçin hormatly Prezidentimiz Serdar Berdimuhamedowa hem-de türkmen halkynyň Milli Liderine HTF-niň adyndan çuňňur hoşallyk bildirdi.

Mälim bolşy ýaly, Türkmenistanyň sport görnüşleri boýunça halkara federasiýalaryň işjeň gatnaşyk saklaýan ýurtlarynyň biridir. Aziýanyň Tennis federasiýasynyň (ATF) Türkmenistanyň Tennis federasiýasy tarapyndan Aşgabatda 12 ýaşa çenli çagalaryň arasynda guralan Merkezi Aziýanyň toparlaýyn çempionatynyň guramaçylyk derejesine ýokary baha bermegi, ATF-nyň ýolbaşçylarynyň 2023-nji ýylyň iýunynda Owganystanyň, Gazagystanyň, Gyrgyzystanyň, Özbegistanyň, Täjigistanyň we Türkmenistanyň toparlarynyň gatnaşmagynda Aşgabatda ikinji gezek geçirilen bu sebit çempionatynyň tennis ýaryşlaryny guramagyň ajaýyp mysalydygyny bellemekleri guwandyryjy ýagdaýdyr. Şu ýerde Aziýanyň Tennis federasiýasynyň şu ýyl geçirilen Baş Assambleýasynda Türkmenistanyň Tennis federasiýasynyň Aziýanyň iň çalt ösýän guramalarynyň biri hökmünde ykrar edilendigini bellemek gerek.

Bäsleşige gatnaşyjylar üçin medeni maksatnamasyna laýyklykda myhmanlara «Älem» medeni-dynç alyş merkezine, Janly tebigatyň milli muzeýine, Halkara ahalteke atçylyk sport toplumyna baryp görmäge, Olimpiýa şäherçesine gezelenç etmäge, «Berkarar», «Aşgabat», «Arkaç» söwda-dynç alyş merkezleri, paýtagtymyzyň beýleki gözel ýerleri bilen tanyşmaga mümkinçilik döredildi.

«Ashgabat Open 2024» halkara ýaryşynyň duşuşyklary oglanlaryň hem-de gyzlaryň arasynda ýekelikde we jübütleýin görnüşde 4 ugur boýunça geçirilýär. Türgenler ýekelikde 1-nji, 2-nji, 3-nji orunlar, jübütleýin görnüşde bolsa 1-nji, 2-nji orunlar ugrunda güýç synanyşarlar. Şeýlelikde, jemi 10 sany medal ugrunda ýaryş bolar. Abraýly ýaryşda ýurdumyza 42 türgen wekilçilik edýär. Häzirki wagtda duşuşyklar tapgyrma-tapgyr geçirilip, ökdeler öňe saýlanýar.