Käbir duşuşyklary iki sagatdan gowrak dowam etse-de, tennis janköýerleri asla ýadatmaýan sport görnüşleriniň hataryna girýär. Gaýtam, türgenleriň haýsydyr birine janköýerlik edip oturyşyňa, wagtyň nähili geçenini hem duýman galýarsyň. Bu duşuşyk seniň üçin hakyky baýramçylyga öwrülýär.

Ýakynda merjen paýtagtymyz şeýle sport baýramçylygyny kabul etdi. Ýer ýüzüniň 12 döwletinden iň güýçli ýetginjek tennisçileriň 60-dan gowragy «Ashgabat Open 2024-iň» ýeňijisi bolmak üçin göreşdiler.

Halkara ýaryşyň ikinji bir ähmiýetli tarapy biziň türgenlerimiziň köpüsine halkara tejribäniň bagyşlanmagydyr. Daşary ýurtlarda geçirilýän ýaryşlara barmak büküp sanaýmalyja türgenlerimiz gatnaşyp bilýän bolsa, «Ashgabat Open 2024-e» olaryň 40-dan hem gowragy gatnaşdy. Olaryň arasynda ýurdumyzyň dürli sebitlerinden ýygnanan türgenler bar. Elbetde, milli synag bilen halkara derejeli synagyň arasyndaky tejribe mekdebi Ýer bilen Gök ýaly tapawutly. Şol tapawudy başdan geçirmek, gör, geljekde nähili belent menzilleriň başlangyjy bolar.

Hakykatdan-da, bu ýaryş türkmen tennisiniň ýaş ýyldyzlarynyň birnäçesini ýüze çykardy. Ilima Guseýnowa (goşa altyn medalyň eýesi), Aly Geldiýew (kümüş medalyň eýesi) ýaly halkara ýaryşlarda baý tejribesi bolan türgenlerimizden başga-da, bu ýaryşyň medallaryna mynasyp bolan Nazar Amangeldiýew, Kerimgeldi Welibegow, Süleýman Hudaýberdiýew, Emirhan Rustamow, Aýnur Annamyradowa, Näzli Hudaýkulyýewa, Aýlar Kakabaýewa, Sülgün Işangulyýewa ýaly zehinler geljekde geçiriljek halkara ýaryşlar üçin bizde «men» diýen türgenleriň bardygyny görkezdi. Olaryň her biri has iriräk ýaryşlarda hem medal gazanyp biljek ukyba eýe.

Aşgabat we Arkadag şäherlerine guralan gezelençler halkara derejeli sport baýramçylygyna aýratyn öwüşgin çaýdy. Merjen paýtagtymyz we Merkezi Aziýadaky ilkinji «akylly» şäher, elbetde, ýaryşa gatnaşmak üçin dünýä döwletlerinden gelen myhmanlarda diýseň uly täsir galdyrdy.