Hakykatdan hem, şeýle boldy. Arkadag şäheriniň adybir futbol topary 23-nji dekabrda geçirilen final duşuşygynda «Ahaly» 1:0 hasabynda ýeňip, Türkmenistanyň Kubogynyň eýesi boldy. Şol gün duşuşygyň geçirilen ýerinde ― paýtagtymyzyň «Aşgabat» köpugurly sport toplumynda Türkmenistanyň çempionatynyň öňdebaryjylaryna hem kubokdyr medallar gowşuryldy. «Arkadag» topary milli çempionatymyzdaky çempionlygy üçin hem kubok bilen sylaglanyldy.

Şeýlelikde, ýaňy bir iki ýaşyny dolduryp barýan topar 2024-nji ýylyň futbol möwsüminde gazanyp boljak üç kubogyň ikisine eýe boldy. Geljek ýylda bolsa şu möwsümiň jemleri boýunça Naýbaşy kubok ugrundaky duşuşyk geçiriler.

«Arkadag» topary şol duşuşykda hem ýeňiş gazanyp bilse, edil 2023-nji ýylda bolşy ýaly, 2024-nji ýyly hem üç kubok bilen jemlär.

23-nji dekabrdaky final duşuşygyna gaýdyp gelsek, duşuşykdaky ýeke-täk goly 45-nji minutda «Arkadag» toparynyň hüjümçisi Begenç Akmämmedow geçirdi. Şeýlelikde, topar taryhynda bassyr ikinji gezek Türkmenistanyň Kubogynyň eýesi boldy. Begenç Akmämmedow bolsa Kubok ýaryşynyň şu möwsümindäki gollarynyň sanyny 6-a çykaryp, iň netijeli futbolçylaryň sanawynda birinji orny eýeledi.

Türkmenistanyň Kubogynyň eýesi bolmak «Arkadag» toparynyň indiki möwsümde yklym ýaryşlaryna gatnaşmak mümkinçiligini hem artdyrýar. Häzirki wagtda-da toparyň AFK-nyň Çagyryş ligasynda üstünlikli ýaryşýandygyny ýatladýarys.