
Gahryman Arkadagymyzyň «Älem içre at gezer» atly kitabyndan: — Dünýäde çagadan gymmatly zat ýokdur
Halkara parahatçylyk we ynanyşmak ýylynyň 21 — 23-nji awgusty aralygynda Türkmenistanyň Söwda-senagat edarasynda «Kids EXPO: ähli zat çagalar üçin» atly halkara sergi-ýarmarkasy geçirildi. Bu ýerde ýurdumyzyň we daşary döwletleriň öňdebaryjy bilim merkezleriniň, çagalar üçin mebelleri, oýnawaçlary, serişdeleri, okuw esbaplaryny we öwrediji gollanmalary öndürýän, şeýle-de iýmit kärhanalarynyň 80-den gowragynyň diwarlyklary gurnaldy. Diwarlyklarda çagalara niýetlenen dürli görnüşli önümleri öndürýän ýurdumyzyň hususyýetçileriniň, Russiýanyň, Hytaýyň, Özbegistanyň hem-de Türkiýäniň kompaniýalarynyň öndürýän önümleri sergilendi. Bu sergi-ýarmarkasynda Arkadag şäherine degişli pawilýonyň bolmagy aýratyn buýsandyryjy ýagdaýdyr. Biz hem «Kids EXPO: ähli zat çagalar üçin» halkara sergi-ýarmarkasyna gatnaşan ildeşlerimiziň ýürek buýsançlaryny okyjylara ýetirmegi makul bildik.
Begli DADEKOW,
Gurbanguly Berdimuhamedow adyndaky çagalar sagaldyş-dikeldiş merkeziniň hünärmeni:
— Sebitde ýeke-täk «akylly» şäher adyna eýe bolan Arkadag şäheri bu günki gün dünýä ýüzüniň ünsüni özüne çekýär. Bu gadymy toprakda häzirki zaman ylmynyň soňky gazananlary giňden ornaşdyrylýar. Bu bolsa «akylly» şäheriň geljeginiň uludygyny görkezýär. Muny Türkmenistanyň Söwda-senagat edarasynda geçirilýän «Kids EXPO: ähli zat çagalar üçin» atly halkara sergi-ýarmarkasyndaky Arkadag şäheriniň pawilýona gelýän myhmanlaryň aýdýan sözlerinden hem aňmak bolýar. Biz hem bu sergä «Arkadag Medisina Klasteri Menejment» kärhanasynyň öndürýän saglygy goraýyş maksatly önümleri bilen gatnaşdyk.

Gysga wagtda kärhananyň önümçilik zynjyry, tehnologiýasy kesgitlenilip, ýörite haryt nyşany döredildi hem-de degişli sertifikatlaşdyrma işleri geçirildi. Kärhananyň öndürýän pamyk taýajyklary, dokalmadyk matadan taýýarlanan bir gezeklik agyz-burun örtükleri, başgaplary, halatlary, aýakgap örtükleri we beýleki serişdeleri häzirki wagtda ýurdumyzyň saglygy goraýyş edaralarynda giňden peýdalanylýar. «Arkadag Medisina Klasteri Menejment» kärhanasynda häzirki wagtda çagalar üçin zerur witaminler bilen baýlaşdyrylan çaga iýmitiniň 7 görnüşi öndürilýär. Daşyndan getirilýän harytlaryň ornuny tutýan, ýurdumyzda öndürmek boýunça giň gerimli işleriň netijesi bolan bu önümler ýokary hil derejesi we ekologik taýdan arassalygy bilen tapawutlanýar. Kärhana geljekde önümçilik hataryny mundan beýläk-de artdyrmagy maksat edinýär.
Ýaşlaryň şäherinde zähmet çekmäge giň mümkinçilikleri döredip berýän Milli Liderimize hem-de hormatly Prezidentimize sagbolsun aýdýarys.
Aýmyrat TUWAKMYRADOW,
«Jahan» döredijilik merkeziniň direktorynyň orunbasary:
— Halkara parahatçylyk we ynanyşmak ýyly ýurdumyza şan getiren ýyllaryň biri boldy diýip ynamly aýdyp bileris. Sebäbi bu ýylda ýurdumyzda birnäçe toýlarymyz toýlandy, baýramçylyklarymyz dünýä derejesinde bellenildi. Şeýle hem halkara forumlary üstünlikli geçirildi. Ynha, bu günki gün hem Türkmenistanyň Söwda-senagat edarasynda «Kids EXPO: ähli zat çagalar üçin» atly halkara sergi-ýarmarkasynyň geçirilmegi uly ähmiýete eýe boldy. Biz hem bu sergä «Jahan» döredijilik merkezinde hereket edýän birnäçe gurnaklaryň işleri bilen gatnaşdyk. Bu ýerdäki edilen işler döredijilik merkeziniň okuwçylaryna hem-de mugallymlaryna degişli. Bu ýerde «Jahan» döredijilik merkezinde esasy okuwyndan soňra okaýan okuwçylar öz çykyşlaryny ýerine ýetirdiler. Saz ugrundan bilim alýan okuwçylarymyz fortopiano saz guralynda saz çalyp, gelen myhmanlaryň şatlygyny goşalandyrdylar. Şeýle hem bu ýerde halyçylyk gurnagynda alnyp barylýan işler bilen hem tanyşdyryldy. Döredijilik merkeziniň okuwçylaryna mugallymlaryň haly dokamagyň inçe syrlaryny öwredýän pursatlary görkezildi.
Biz ýaşlara Watanymyzyň ösüşini, özgerişini wasp etmek borjumyz bolup durýar. Nesip bolsa, geljekde-de asuda abadan ýurdumyzyň ösüşine öz mynasyp goşandymy goşjakdygyma ynandyrýaryn. Geljegiň eýeleri üçin giň mümkinçilikleri döredip berýän Gahryman Arkadagymyzyň hem-de Arkadagly Gahryman Serdarymyzyň janlary sag, belent başlary aman, il-ýurt bähbitli alyp barýan işleri hemişe rowaç bolsun!