Bu gün mähriban halkymyz mukaddes Garaşsyzlygymyzyň 34 ýyllyk baýramyna hem-de bu şanly senäniň öňüsyrasynda geçiriljek Türkmenistanyň Halk Maslahatynyň mejlisine, hemişelik Bitaraplygymyzyň 30 ýyllyk şanly toýuna uly zähmet üstünlikleri bilen barýar. 20-nji awgustda türkmen halkynyň Milli Lideri Gahryman Arkadagymyzyň başlyklyk etmeginde geçirilen Türkmenistanyň Halk Maslahatynyň Prezidiumynyň mejlisinde ýurdumyzyň syýasy-jemgyýetçilik durmuşynda möhüm orny eýeleýän umumymilli forumy hem-de hemişelik Bitaraplygymyzyň 30 ýyllyk baýramyny ýokary derejede guramak we geçirmek boýunça meseleleriň giň toplumy ara alnyp maslahatlaşyldy.

Halk Maslahatynyň Prezidiumynyň Kararyna laýyklykda, Türkmenistanyň Halk Maslahatynyň nobatdaky mejlisini 19-njy sentýabrda çagyrmak we ony Aşgabat şäherindäki Maslahat köşgünde geçirmek bellenildi. Mälim bolşy ýaly, milli döwletlilik ýörelgelerimiziň nyşany bolan maslahatyň mejlisine az wagt galdy. Oňa ýokary derejede görülýän taýýarlyga mynasyp goşant goşmak her birimiziň borjumyzdyr.

Türkmenistanyň Halk Maslahatynyň mejlisiniň geçirilmeginiň baş maksady diňe bir ýylyň dowamyndaky işleriň jemlerini seljermek bilen çäklenmän, eýsem, şöhratly geçmişimize hem-de bagtyýar şu günümize nazar aýlap, röwşen geljegimize ynamly gadam urmak üçin döwrüň möhüm meselelerini, zerurlyklaryny, özgerýän dünýäniň şertlerini göz öňünde tutmak bilen, agzybir il-ulus bolup döwletli çözgütleri kabul etmekden ybaratdyr. Bu işde ata-babalarymyzyň şöhratly geçmişi we asylly ýörelgeleri bize ruhy güýç-kuwwat berýär, röwşen geljege uzaýan ýolumyza şugla saçýar.

Ýurt Garaşsyzlygymyza eýe bolup, döwletimiziň özygtyýarly ösüş ýoluna düşen ýyllarynyň dowamynda ýurdumyzyň syýasy-jemgyýetçilik gurluşynyň binýadyny berkitmek, döwletimiziň galkynyşyny we halkymyzyň eşretli durmuşyny üpjün etmek boýunça örän uly işler bitirildi. Täze taryhy döwürde halkyň bähbidine wekilçilik edýän Türkmenistanyň Halk Maslahatynyň döredilmegi we öz işini ýokary derejede alyp barmagy halk demokratiýasyny has-da dabaralandyrmakda, jemgyýetimizi mundan beýläk hem jebisleşdirmekde, halkymyzyň agzybirligini berkitmekde möhüm ähmiýete eýedir. Munuň özi döwlet häkimiýetiniň ýeke-täk gözbaşy bolan halkyň öz häkimiýetini amala aşyrmaga bolan konstitusion hukuklarynyň ýurdumyzda nusgalyk derejede üpjün edilýändigini aýdyň görkezýär.

Ýurdumyzyň durmuş-ykdysady ösüşinde Gahryman Arkadagymyzyň öňdengörüjilikli başlangyçlary esasynda döredilen Türkmenistanyň Senagatçylar we telekeçiler birleşmesiniň möhüm ornunyň bardygy aýdyň hakykatdyr. Bu günki gün türkmen telekeçileri we senagatçylary oba hojalygy, azyk senagaty, gurluşyk we gurluşyk önümçiligi, innowasion tehnologiýalar ýaly ugurlarda uly işleri amala aşyrýarlar. Senagatçylar we telekeçiler gysga döwürde ýurdumyzda azyk önümlerini hem-de ilatyň gündelik sarp edýän beýleki harytlaryny dünýä standartlaryna laýyk derejede we bol öndürýärler. Häzirki döwürde milli haryt nyşanly önümler diňe bir ýurdumyzda däl, eýsem, dünýä bazarlarynda-da ýokary islegli önümleriň hatarynda mynasyp orun eýeleýär.

Milli ösüş maksatnamalaryny durmuşa geçirmäge işjeň gatnaşýan Türkmenistanyň Senagatçylar we telekeçiler partiýasynyň agzalary hem hususy pudaga degişli kärhanalarda Garaşsyz, hemişelik Bitarap döwletimiziň amala aşyrýan içeri we daşary syýasatyny, ýurdumyzda alnyp barylýan toplumlaýyn özgertmeleri, gazanylýan uly üstünlikleri, ýetilýän belent sepgitleri wagyz etmek bilen baglanyşykly wezipeleri berjaý edýärler. Watanymyzyň ähli taryhy ösüş pursatlarynda döwlet dolandyryşynyň iň derwaýys meselelerine Halk Maslahatynyň mejlislerinde garalyp, döwlet, jemgyýetçilik durmuşyny ösdürmäge gönükdirilen çözgütler kabul edilýär. Şol çözgütleriň kabul edilmegine jemgyýetçiligiň ähli ulgamlarynyň wekilleriniň gatnaşmagy halk häkimiýetliliginiň ýörelgelerine laýyk gelýär. Umumymilli forumyň geçen ýyllardaky mejlislerinde ähli ulgamlar bilen bir hatarda, hususyýetçiligi ösdürmek babatda öňe sürlen teklipleriňdir kabul edilen çözgütleriň oňyn netijeleri berýändigini biz bu günki gün aýdyň görýäris. Halk Maslahatynyň şu gezekki mejlisinde hem şeýle çözgütleriň kabul ediljekdigine berk ynanýarys.

Halkymyzyň agzybirlik, döwletlilik, özbaşdaklyk baradaky köpasyrlyk arzuw-isleglerinden bina bolan eziz Watanymyzyň — Garaşsyz, hemişelik Bitarap Türkmenistanyň gülläp ösmegi, berkarar türkmen döwletiniň dünýädäki at-abraýynyň barha beýgelmegi, halkymyzyň eşretli durmuşynyň dowamat-dowam bolmagy ugrunda nusgalyk işleri amala aşyrýan Arkadagly Gahryman Serdarymyza hem-de Gahryman Arkadagymyza tüýs ýürekden alkyş aýdýarys.