Türkmenistanyň, Azerbaýjan Respublikasynyň, Özbegistan Respublikasynyň ýokary derejeli duşuşygy hakda

Mähribanlyga öwrülen ýollar ýene duşurarmyş. Ol ýollarda çakylyk bar, çagyryş bar. Türkmenbaşy Halkara howa menzilinde düşüp, «Awaza» milli syýahatçylyk zolagyna ugranyňda, muňa göz ýetirýärsiň. Entek köp wagt hem geçmedi. Taryhy wakalaryň geçirilýän ýerine öwrülen Awazada ýaňy-ýakynda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahaty tamamlandy. Munuň yzysüre, 22-nji awgustda Türkmenistanyň, Azerbaýjan Respublikasynyň, Özbegistan Respublikasynyň ýokary derejeli duşuşyklarynyň geçirilmegi Awazanyň ýöne-möne künjek däldigini, geljek üçin pikir-garaýyşlaryň, çözgütleriň esasynda möhüm meseleleriň maslahatlaşylýan mekanydygyny mälim etdi.

Awaza duşuşygy türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowyň goňşy döwletleriň Baştutanlaryny myhmansöýerlik bilen garşylamagyndan başlap, wakalaryň her bir pursady goňşuçylyk gadyrdanlygy esasynda dowam etdi. Howa menzilinden Awaza barýan ýollarda üç dilde taryhy wakanyň şanyna ýazylan «Türkmenistana hoş geldiňiz!», «Türkmənistana xoş gəlmisiniz!», «Turkmanıstonga xush kelıbsız!» ýa-da «Türkmenistanyň, Azerbaýjan Respublikasynyň, Özbegistan Respublikasynyň ýokary derejedäki duşuşygy», «Türkmənistan, Azərbaycan Respublikası və Özbəkistan Respublikası arasında yüksək səviyyəli görüş», «Turkmanıston, Ozarbayjon Respublıkası, O‘zbekıston Respublıkasınıng olıy darajadagı uchrashuvı» ýaly mübärek sözler öwüşgin berýärdi.

Üç döwlet, bir maksat. Könekilerimiziň galdyran pähimine görä, «Tagan aýagy üç bolar...». Kongresler merkezinde taryhy jähetden ilkinji gezek geçirilen üçtaraplaýyn duşuşygyň mazmun-manysynda bir-birege söýget bolmak, dostluk köprüsini mundan beýläk-de ählitaraplaýyn gülläp ösüşleriň köprüsi hökmünde berkitmegiň anyk ugurlary jemlenýär. Türkmenistan döwletimiz bilen doganlyk ýurtlaryň Bilelikdäki Beýannamasy hem uly ähmiýete eýe bolup, taraplaryň geljekki ösüşini kesgitleýär. Bular dogrusynda Milli Liderimiziň ikitaraplaýyn we üçtaraplaýyn geçiren duşuşyklarynda birin-birin durlup geçildi. Halkara howa gatnawy, gämi gurluşyk, raýat awiasiýasy, ulag-logistika ýaly gol çekilen resminamalar hem hyzmatdaşlygyň köpugurlydygyny kesgitleýär. Bularyň hatarynda Arkadag şäheri bilen Azerbaýjanyň Fizuli şäheriniň arasynda doganlyk gatnaşyklaryny ýola goýmak hakyndaky teswirnamanyň bolmagy dostlugyň barha pür-pudak ýaýradyp, gül-gül açýandygyna anyk-aýdyň güwädir.

Geçen iýul aýynda Gahryman Arkadagymyz Azerbaýjana saparyny amala aşyrdy. Ol ýerde diňe bir ýurduň paýtagty Baku şäherinde bolman Fizuli, Şuşa şäherlerine baryp gördi. Milli Liderimiziň şol mübärek saparynyň netijesinde doganlyk halkyň şäheri doganlaşdy. Ol ýerde gurluşygy alnyp barylýan şäher boýunça baş binagärimiz Gahryman Arkadagymyza iri desgalaryň taslamalary tanyşdyryldy. Milli Liderimize gurluşyk işlerindäki taýsyz nesihatlary üçin diýseň hoşal bolupdylar. Ynha, indi Milli Liderimiziň pähim-paýhasy netijesinde dünýä nusgalyk şäher hökmünde tanalýan «akylly» şäher konsepsiýasy esasynda gurlan Arkadag şäheri bilen doganlaşýanlaryň sany artýar. Mundan owal Kazan, Telawi, Mezon-Laffit, Hujand ýaly şäherler sanawy düzýärdi. Şanly ýylda — ynanyşmagyň, ysnyşmagyň ýylynda Fizuli şäheriniň munuň üstüni ýetirmegi Gahryman Arkadagymyzyň «akylly» şäheriniň hemmetaraplaýyn esasynda ýola goýan başlangyçlarynyň rowaç bolýandygynyň subutnamasydyr.

* * *

Geografik babatda alanyňda hem Türkmenistan goňşy ýurtlaryň bähbitleri üçin netijeli işlerini gaýgyrmaýar. Duldegşir dostlukly döwletler hem Watanymyzyň dünýädäki abraýyna her dem buýsanyp ýaşaýarlar.

Ýurtlary ýollar baglanyşdyrýar. Ykballary ýollar birleşdirýär. Biziň ýurdumyz — Beýik Ýüpek ýolunyň ýüreginde ýerleşmek bilen sebitiň ýurtlary üçin hem möhüm merkez hökmünde tanalýar. Gahryman Arkadagymyzyň «Türkmenistan — Beýik Ýüpek ýolunyň ýüregi» atly eseriniň II jildinde belleýşi ýaly: «Türkmenistanyň logistika strategiýasynyň özenini taryhylyk ýörelgesi emele getirdi. Biziň döwletimiziň çäklerinden irki döwürlerde yklymyň döwletlerini we halklaryny birleşdiren söwda ýollarynyň esasy şahalary geçipdir. Ol medeniýetleriň ösmeginde, Gündogar bilen Günbataryň özara gatnaşygynda ägirt uly orun eýelän Beýik Ýüpek ýoludyr». Şöhratly ýoluň döwrebap derejede galkynmagyny häzirki wagtda gurluşygynyň ahyrky bölegi alnyp barylýan Aşgabat — Türkmenabat awtobanynyň mysalynda hem aýtmak bolar. Ýokary tizlikli ýol ýük gatnawlary üçin hem Gündogardan Günbatara amatly gatnawy üpjün eder. Özbegistan üçin hem bu ýoluň ähmiýeti iňňän uly bolar. Şunlukda, Türkmenbaşy Halkara deňiz portundan ýükleri Azerbaýjana, ondan aňry alys ýurtlara eltmekde amatly mümkinçilik döreder.

* * *

Awaza duşuşygy mynasybetli «Rowaç» kottejler toplumynyň ýanyndaky meýdançada türkmen myhmansöýerligini açyp görkezýän toý dabarasy dowam etdi. Çar ýanda ak öýler dikilip, toý gazanlary atarylyp, bagşy-sazandalaryň owazy belentden ýaňlandy. Milli gymmatlyklarymyzyň sergisi aýratyn bezeg berýärdi. «Galkynyş» milli at üstündäki oýunlar toparynyň çykyşlary ähli gatnaşyjylarda uly täsir galdyrdy. Türkmeniň ata nähili erk edýändigini azerbaýjan, özbek doganlarymyz ýene bir gezek synladylar. Şu ýyl Monako Knýazlygynyň Monte-Karlo şäherinde geçirilen 47-nji halkara sirk sungaty festiwalynda Altyn kuboga we ýörite baýraklara mynasyp bolan toparyň çykyşlaryny synlamagyň hem özleri üçin unudylmaz pursada öwrülendigini buýsana-buýsana bellediler.

Hormatly Prezidentimiziň, Gahryman Arkadagymyzyň, türkmen halkynyň adyndan Azerbaýjanyň Prezidenti Ilham Aliýewe «Taus» atly ahalteke aty, Özbegistanyň Prezidenti Şawkat Mirziýoýewe köşekli arwana düýe sowgat berilmeginde halklaryň arasyndaky gatnaşyklaryň mundan beýläk-de dowamly bolmagynyň arzuwlary jemlendi. Elbetde, at — myrat. Myrada gowuşmagyň simwoly. Arwana düýe — menzil aşmagyň nyşany. «Türkmenistan — Azerbaýjan — Özbegistan» formatyndaky üçtaraplaýyn duşuşyklaryň esasynda Beýik Ýüpek ýolunyň ýüreginde gadymy ýollaryň bu günki gün dostlugyň-doganlygyň ýoly hökmünde gülläp ösüşlere eýe bolýandygyny görkezdi. Bu ýoluň ähmiýeti Gahryman Arkadagymyzyň, Arkadagly Gahryman Serdarymyzyň öňdengörüjiligi, paýhasy bilen ýokary derejä göterilýär. Muňa buýsanjyň nyşany hökmünde hanha, atly ýigitlerimiz hem ýaşyl tugumyzy belentde parladyp, döwrüň bu hakykatyny dünýä buşlaýarlar.

Guwanç MÄMIÝEW.

«Arkadag» gazetiniň baş redaktory.