Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda Türkmenistanyň hemişelik Bitaraplyk derejesine eýe bolmagyna 30 ýyl dolýar. 2025-nji ýylyň BMG tarapyndan «Halkara parahatçylyk we ynanyşmak ýyly» diýlip atlandyrylmagynda hem çuňňur many bar. Onuň eziz Watanymyz tarapyndan hödürlenen Kararnama esasynda kabul edilmegi Gahryman Arkadagymyzyň hem-de hormatly Prezidentimiziň tagallalary bilen dünýä ýüzünde parahatçylygy we ynanyşmagy öňe sürýän ýurdumyzyň Bitaraplyk taglymatyny has-da dabaralandyrýar.

Türkmen Bitaraplygy we onuň yklymda parahatçylygy we asudalygy üpjün etmekde, halklaryň arasyndaky dost-doganlyk gatnaşyklaryny has-da pugtalandyrmakda, ýagty geljek üçin tagallalary birleşdirmekdäki uly ähmiýeti halkara media ulgamynda hem özüniň mynasyp ornuny eýeleýär. Munuň özi türkmen halkynyň Milli Lideri Gahryman Arkadagymyzyň alyp barýan çuňňur oýlanyşykly strategiýasynyň aýdyň netijesidir. Ýer ýüzünde parahatçylygyň pugtalandyrylmagyna uly goşant goşýan Türkmenistanyň Bitaraplyk ýörelgesine esaslanýan daşary syýasatynyň dünýä jemgyýetçiliginiň giň goldawyna eýe bolýandygyny Gahryman Arkadagymyzyň beýik başlangyçlary bilen durmuşa geçirilýän işlerden aýdyň görýäris. Şol jähetden ýurdumyzyň Bitaraplyk ýörelgeleri diňe bir sebitde däl, eýsem, bütin dünýäde dost-doganlygy, agzybirligi, abadançylygy, parahatçylygy we ynanyşmagy dabaralandyrmakda, halk köpçüligine ýetirmekde hem-de onuň mazmunyny düşündirmekde örän ähmiýetlidir. Häzirki wagtda Garaşsyz, Bitarap Türkmenistanyň parahatçylyk söýüjilikli daşary syýasat ugry, dürli ulgamlarda ýetýän belent sepgitleri, baý medeni mirasy, gözel tebigaty dünýä jemgyýetçiliginiň ünsüni çekýär. Ýurdumyzyň alyp barýan içeri we daşary syýasatyny, ykdysadyýet, medeni-ynsanperwer, syýahatçylyk ugurlarynda bar bolan mümkinçiliklerini giňden ýaýmak boýunça meşhur köpçülikleýin habar beriş serişdeleri bilen hyzmatdaşlyga aýratyn ähmiýet berilýär.

Halkara parahatçylyk we ynanyşmak ýylynyň ilkinji aýlarynda Milli Liderimiziň «Euronews» telekompaniýasynyň direktorlar geňeşiniň başlygy bilen duşuşmagy bellärliklidir. Şonda Milli Liderimiz şu ýyl Türkmenistanyň Bitaraplygynyň 30 ýyllyk şanly baýramyny belleýändigini, geçen döwrüň içinde sebit we dünýä ähmiýetli örän köp işleriň edilendigini, ol işleriň häzirki wagtda-da üstünlikli amala aşyrylýandygyny nygtady.

Türkmen halkynyň Milli Lideri Gahryman Arkadagymyzyň umumadamzat ähmiýetli başlangyçlary, ýurdumyzyň ägirt uly ykdysady kuwwatyny bütin dünýäde abadançylygy, asudalygy, durnukly ösüşi gazanmak üçin ulanmakda öňe sürýän wajyp teklipleri, türkmen Bitaraplygyna esaslanýan gymmatly taglymaty halkara derejesinde köpçülikleýin habar beriş serişdelerinde özüniň anyk beýanyny hem-de giň goldawyny tapýar. Golaýda «Awaza» milli syýahatçylyk zolagynda ýokary guramaçylyk derejesinde geçirilen BMG-niň Deňze çykalgasy bolmadyk ösüp barýan döwletler boýunça üçünji maslahaty mynasybetli dabarada

Gahryman Arkadagymyzyň: «Biz Türkmenistanyň Bitaraplygyny özara düşünişmek köprülerini gurmak üçin şertleri, esasy ählumumy meseleler boýunça köptaraplaýyn dialog, ykdysady, ekologiýa, syýasy, durmuş, ynsanperwer ulgamlarda jogapkärçilikli hyzmatdaşlyk üçin platformany döretmäge gönükdirmegi maksat edinýäris» diýip bellemegi hem çuňňur many-mazmuna eýe boldy. Milli Liderimiziň bu taryhy çykyşy halkara derejesinde giň goldawa eýe bolup, türkmen Bitaraplygynyň diňe bir sebitde däl, eýsem, bütin dünýäde asuda, bagtyýar durmuşy, dost-doganlygy dabaralandyrýandygyny nobatdaky gezek äşgär etdi. Munuň özi ýurdumyzyň hemişelik Bitaraplyk derejesiniň we ondan gelip çykýan umumadamzat bähbitlerine gönükdirilen beýik taglymatyň Gahryman Arkadagymyzyň başyny başlan, Arkadagly Gahryman Serdarymyzyň mynasyp dowam etdirýän öňdengörüjilikli syýasaty bilen berk baglanyşyklydygyny görkezýär.

Garaşsyz, hemişelik Bitarap Türkmenistan döwletimiziň, mähriban halkymyzyň nurana geljegini bütin dünýäniň asudalygy, abadançylygy bilen baglanyşdyrýan, şeýle hem bu ugurda halkara derejesinde örän möhüm başlangyçlary we teklipleri öňe sürýän Gahryman Arkadagymyzyň her bir çuň mazmuna ýugrulan taglymaty hemmetaraplaýyn ykrar-goldawa eýe bolýar.