Täze, 2025-nji ― Halkara parahatçylyk we ynanyşmak ýyly mynasybetli Arkadag şäherinde geçirilen dabaralar şatlyk-şowhuna, buýsançly duýgulara beslendi. Düýn ir säher bilen şäheriň Baş baýdak meýdançasynda Döwlet senamyzyň joşgunly mukamynyň ýaňlanmagy bilen ýaşyl tugumyzyň belende göterilmegi täze ýylyň ajaýyp waspyna öwrüldi. Arkadag şäheriniň häkimliginiň guramagynda geçirilen dabara Mejlisiň deputatlary, syýasy-jemgyýetçilik guramalaryň, edara-kärhanalaryň ýolbaşçylary, ýaşuly we ýaş nesliň wekilleri hem-de şäheriň ýaşaýjylary gatnaşdylar. Al-asmanda parlaýan ýaşyl tugumyzyň astynda dowam eden baýramçylyk dabarasynda çykyşlara giň orun berildi. Baýramçylyk çäresiniň dowamynda ýerine ýetirilen aýdym-sazly çykyşlar ýüreklerde orun alyp, dabaranyň şatlygyny has-da artdyrdy.