13-nji ýanwarda paýtagtymyzdaky Türkmenistanyň Döwlet medeniýet merkeziniň Mukamlar köşgünde 2025-nji ýylyň «Halkara parahatçylyk we ynanyşmak ýyly» diýlip atlandyrylmagy mynasybetli «Arkadagly Serdaryň dünýä uzan ak ýoly — Halkara parahatçylyk we ynanyşmak ýyly» atly dabaraly maslahat geçirildi. Oňa Hökümet agzalary, Mejlisiň, Halk Maslahatynyň, ministrlikleriň, pudaklaýyn dolandyryş edaralarynyň, jemgyýetçilik guramalarynyň ýolbaşçylary, bilim-ylym işgärleri, köpçülikleýin habar beriş serişdeleriniň wekilleri gatnaşdy. Mukamlar köşgüniň eýwanynda ýaýbaňlandyrylan amaly-haşam sungatynyň eserleriniň sergisi mukaddes Garaşsyzlygymyzy, baky Bitaraplygymyzy, halkymyzyň eşretli durmuşyny, milliligini, baý mirasyny şöhlelendirmek bilen, maslahata gatnaşyjylarda uly täsir galdyrdy.

Dabaraly maslahat türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Türkmenistan — parahatçylygyň we ynanyşmagyň Watany» atly goşgusyna döredilen ajaýyp aýdymyň ýerine ýetirilmegi bilen başlandy. Häzirki döwrüň bagt owazyna öwrülen bu eser ýurdumyzyň parahatçylyk söýüjilik, bitaraplyk, dost-doganlyk, ählumumy abadançylyk ugrunda öňe sürýän başlangyçlaryny wasp edýär.

Çykyşlara giň orun berlen maslahatda bellenilişi ýaly, Türkmenistanyň başlangyjy boýunça BMG-niň Baş Assambleýasy 2025-nji ýyly «Halkara parahatçylyk we ynanyşmak ýyly» diýip yglan etmek hakynda Kararnamany 86 döwletiň awtordaş bolup çykyş etmeginde biragyzdan kabul etdi. Geçen ýylyň 27-nji dekabrynda geçirilen Ministrler Kabinetiniň we Döwlet howpsuzlyk geňeşiniň giňişleýin mejlisinde bolsa, ýurdumyzda 2025-nji ýylyň şygary «Halkara parahatçylyk we ynanyşmak ýyly» diýlip yglan edildi. Mälim bolşy ýaly, bu şygar halkymyzdan gelip gowşan teklipleriň hem-de Gahryman Arkadagymyzyň jöwher paýhasyndan dörän «Türkmenistan — parahatçylygyň we ynanyşmagyň Watany» atly ajaýyp goşgusynyň esasynda, Milli Liderimiziň gymmatly maslahatlaryna eýerip hem-de Türkmenistanyň başlangyjy bilen BMG-niň Baş Assambleýasy tarapyndan «2025-nji ýyl — Halkara parahatçylyk we ynanyşmak ýyly» atly Kararnamanyň biragyzdan kabul edilmegi mynasybetli öňe sürüldi.

Maslahatyň dowamynda Halkara parahatçylyk we ynanyşmak ýyly mynasybetli geçiriljek dabaralaryň eziz Diýarymyzyň hemişelik Bitaraplygynyň şanly 30 ýyllygy bilen utgaşýandygy barada aýratyn nygtaldy. Joşgunly çykyşlara uly orun berlen dabaraly maslahatda 2025-nji ýylyň şygaryna bagyşlanyp döredilen täze goşgular okalyp, ajap owazly aýdymlar ýaňlandy. Olarda Gahryman Arkadagymyzyň, Arkadagly Gahryman Serdarymyzyň ýolbaşçylygynda durmuşa geçirilýän umumadamzat ähmiýetli işler öz beýanyny tapdy.

Dabaranyň ahyrynda maslahata gatnaşyjylar hormatly Prezidentimiz Serdar Berdimuhamedowyň adyna Ýüzlenme kabul etdiler.