Hormatly Prezidentimiz Serdar BERDIMUHAMEDOW:

— Ýurdumyzda «Arkadag Medisina Klasteri Menejment» kärhanasynyň döredilmegi bilen, dürli görnüşli lukmançylyk serişdeleriniň önümçiligi ýola goýuldy. Saglygy goraýyş ulgamynda yzygiderli ulanylýan, ekologik taýdan arassa ýerli çig mallardan öndürilýän bu önümler geljekde dünýä bazarlarynda uly orny eýelär.

Türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň taýsyz tagallalary bilen döredilen «Arkadag Medisina Klasteri Menejment» kärhanasynda saglygy goraýyş ulgamynda gündelik ulanylýan lukmançylyk serişdeleriniň dürli görnüşleri, pamyklar, dokalmadyk matadan taýýarlanan bir gezeklik agyz-burun örtükleri, başgaplary, halatlary, ýorgan-düşek daşlyklary, aýakgap örtükleri, 6 aýdan uly bäbejikler üçin goşmaça iýmit bolan süýtli çaga şülesiniň 4 görnüşi, ýagny tüwüli, tüwüli we bananly şüle, hemenek (manny) ýarmasy we ary bally şüle, däneli ösümlikleriň şülesi we beýleki saglyk maksatly serişdeleri öndürmek ýola goýuldy.

Şamuhammet ARBABOW,
«Arkadag Medisina Klasteri Menejment» kärhanasynyň önümçilik müdiri:

—«Arkadag Medisina Klasteri Menejment» kärhanasy häzirki döwrüň döwrebap çözgütleriniň biridir. Önümçilikde howpsuzlyk, arassaçylyk düzgünleri ýokary ölçeglere laýyklykda ýola goýuldy. Harytlaryň önümçiliginde ilki gury önüm ýörite gaplarda ýygnalýar we garylýar. Onuň bir bölegi bolsa barlaghana tabşyrylýar. Barlaglardan soňra, önüm ýörite geçiriji ulgam arkaly guýujy topluma iberilýär. Bu ýerde gury önüm bir gezeklik ulanylýan ykjam haltalara gaplanýar. Her gutynyň agramynyň, belgilenilişiniň, öndürilen senesiniň talabalaýyk bolmagy gazanylýar. Haryt 12 sany önüm gutusyndan ybarat bolan uly gaba ýerleşdirilýär. Gutarnykly önümden bir nusgasy barlaghanada ýene goşmaça barlagdan geçirilýär. Önümler Türkmenistanyň Saglygy goraýyş we derman senagaty ministrliginiň Döwlet arassaçylyk we keselleriň ýaýramagyna garşy göreşmek gullugynyň Jemgyýetçilik saglygy we iýmit merkeziniň hil menejment ulgamynyň TDS ISO 9001 talaplaryna laýyk gelýän barlaghanalarynda degişli barlaglardan geçirilenden soň, ulanylyşa goýberilýär. Kärhanada her günde 30 — 40 müň sany çaga iýmitleri öndürilýär.

Şeýle ajaýyp şertlerde zähmet çekmäge, halka hyzmat etmäge uly mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, tutumly işleri elmydama rowaç bolsun!

Bägül HEÝRBEKOWA,
«Arkadag Medisina Klasteri Menejment» kärhanasynyň esasy hünärmeni:

— Biz kärhana gelýän çig mallary kabul etmek bilen, önümiň hiline, ulanylýan gutularyň we olaryň daşky belgileriniň dogry ýerleşdirilişine gözegçiligi amala aşyrýarys. Häzirki wagtda ýurdumyzyň dürli künjekleriniň saglygy goraýyş edaralarynyň çagalar bölümlerini çaga iýmitleriniň kesgitli bölegi bilen üpjün etmekde netijeli işler ýola goýuldy. Ýeterlik derejede öndürilýän bu önümler daşary ýurtlara hem eksport edilýär. Ýeri gelende belläp geçsek, «Gury ertirlikler» bölüminde 3 sany täze harydyň önümçiligi ýola goýuldy. Şokolad tagamly gury ertirlik, tebigy ary bally gury ertirlik we banan tagamly gury ertirlik önümleri diňe bir çagalara däl, eýsem, uly ýaşlylara hem niýetlenendir. Bu önümler süýde ezilip iýilýär. Olaryň düzüminde ynsan bedeni üçin peýdaly witaminleriň köp mukdary bar. Tebigy däneleriň esasynda taýýarlanylýan harytlar ýokary hilli bugdaý uny, mekgejöwen uny, mekgejöwen peti we hemenek ýarmasy esasynda öndürilýär.

Arkadag şäherinde döredilen «Arkadag Medisina Klasteri Menejment» kärhanasynda alnyp barylýan işler halkyň, aýratyn hem ösüp gelýän ýaş nesilleriň bähbitlerine, olaryň sagdyn ösüp kemala gelmegine gönükdirilendir. Goý, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, asyrlara ýaň salýan nusgalyk işleri rowaç bolsun!