27-nji ýanwarda döwlet Baştutanymyzyň gol çeken Kararyna laýyklykda, Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetine Arkadag şäherinde azyk, senagat, derman we saglygy goraýyş maksatly serişdeleriň önümçilik zolagynda binalary hem-de desgalary gurmak üçin maslahat beriş hyzmatlaryny ýerine ýetirmek barada Germaniýa Federatiw Respublikasynyň «Goetzpartners Emerging Markets GmbH» kompaniýasy bilen şertnama baglaşmaga ygtyýar berildi.

* * *

11—14-nji fewral aralygynda hormatly Prezidentimiz Serdar Berdimuhamedowyň Buýrugy bilen Arkadag şäherine emeli aň, geljegiň ykdysadyýeti, bilim, şäherleşme, saglygy goraýyş ulgamlarynda täzeçil çemeleşmeleri ornaşdyrmak babatda özara tejribe alyşmak, şeýle hem halkara hyzmatdaşlygyň meselelerini maslahatlaşmak maksady bilen, ýurdumyzyň wekiliýeti Birleşen Arap Emirliklerinde iş saparynda boldy.

* * *

24-nji fewralda Arkadag şäheriniň oba hojalyk toplumynyň binasynda hormatly Prezidentimiziň tabşyrygyna laýyklykda, ýurdumyzyň ylmy-önümçilik merkezleriniň ylmy-barlag ekerançylyk we däneçilik institutlary öz işine başlady. Gahryman Arkadagymyz toplumyň binalarynyň enjamlaşdyrylyşy, bu ýerde oba hojalyk pudagyny ylmy esasda ösdürmek üçin döredilen şertler we mümkinçilikler bilen tanyşdy.

* * *

29-njy martda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilen güni mynasybetli Arkadag şäheriniň häkimliginde «Türkmen halkynyň Milli Lideriniň ynsanperwerlige esaslanýan taryhy başlangyçlary: howandarlygyň we çagalara mähirli garaýşyň nusgalyk tejribesi» atly maslahat geçirildi.

* * *

25 — 30-njy mart aralygynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň howandarlygynda Arkadag şäherinde mekdep okuwçylarynyň arasynda halkara matematika olimpiadasy geçirildi. Oňa jemi 120-den gowrak mekdep okuwçysy gatnaşdy.

* * *

4-nji aprelde Milli Liderimiziň Täjigistan Respublikasyna resmi saparynyň dowamynda Arkadag we Hujand şäherleriniň arasynda doganlyk gatnaşyklaryny ýola goýmak barada Arkadag şäheriniň häkimligi bilen Hujand şäheriniň döwlet häkimiýetiniň ýerine ýetiriji edarasynyň arasynda Ylalaşyga gol çekildi.

* * *

4-nji aprelde hormatly Prezidentimiziň gol çeken Buýrugyna laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan saglygy goraýyş maksatly we çagalara niýetlenen önümler täjik halkynyň çagalaryna sowgat berildi.

* * *

1-nji iýunda Çagalary goramagyň halkara gününde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan yglan edilen «Biz — Arkadag Serdarly Watanyň bagtyýar nesilleri» atly döredijilik bäsleşiginiň ýeňijileri sylaglandy.

* * *

22 — 27-nji iýun aralygynda Medeniýet hepdeligi geçirildi. Ol Arkadag şäheriniň Aman Gulmämmedow adyndaky döwlet drama teatrynda dabaraly açylyşy bilen badalga aldy. Bu medeniýet hepdeligi «akylly» şäheriň giň mümkinçiliklerini tanyşdyrmakda, at-abraýynyň has-da dabaralanmagynda uly ähmiýete eýe boldy.

* * *

28-nji iýunda Arkadag şäheriniň binagärlik-şähergurluşyk keşbini has-da gözelleşdirmek maksady bilen, Türkmenistanyň Prezidenti Karara gol çekdi. Resminama laýyklykda, degişli edara-kärhanalara binalaryň we desgalaryň taslamalaryny düzmek hem-de olary ýanaşyk ýerlerini abadanlaşdyryp gurmak barada ýerli gurluşyk kärhanalary bilen şertnamalary baglaşmaga ygtyýar berildi.

* * *

29-njy iýunda Arkadag şäheriniň bir ýyllygy mynasybetli dabaralar geçirildi. Asman jisimlerini öwrenýän «Kosmos-Ýer» jemgyýetiniň alymlarynyň Arkadag şäheriniň açylmagynyň bir ýyllygy mynasybetli we bu şähere bolan buýsanjyň nyşany hökmünde asmandaky ýyldyzlaryň birine «Arkadag» diýip at goýlandygy barada hoş habar aýdyldy.

* * *

29-njy iýunda «Arkadag Medisina Klasteri Menejment» kärhanasyna Türkmenistanyň sertifikatlaşdyryş ulgamy tarapyndan hil ulgamynyň laýyklyk güwänamasy berildi. Bu güwänama «Hil menejmentiniň ulgamy» diýen ugur boýunça önümleriň hil ulgamynyň TDS ISO 9001-iň bellenen talaplaryna laýyk gelýändigini tassyklaýar. Munuň özi kärhananyň öndürýän önümleriniň hil görkezijilere, şol sanda lukmançylyk ulgamyna degişli hil görkezijileri babatda ýokary talaplara laýyk gelýändigine şaýatlyk edýär.

* * *

Sentýabrda Arkadag şäheri Koreýa Respublikasynda geçirilen «World Smart City Expo 2024» atly halkara sergide «Iň tapawutlanan «akylly» şäher» (Smart City Excellence Award), «Daşary ýurt «akylly» şäheri» (Foreign city award), «World Smart City Expo 2024» halkara sergisine goşan uly goşandy üçin» (WSCE 2024 Contribution Award) baýraklaryna mynasyp boldy.Şunda «Iň tapawutlanan «akylly» şäher» diýen baýrak bilen diňe Arkadag şäheriniň sylaglanandygy aýratyn buýsançlydyr.

* * *

11-nji sentýabrda Türkmenistanyň Prezidenti Buýruga gol çekdi. Resminama laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hasabyna çaga iýmiti, azyk önümleri, bugdaý, karbamid, dizel ýangyjy, benzin we sement ynsanperwerlik kömegi hökmünde Owganystana iberildi.

* * *

Sentýabrda «Arkadag şäheri — döwrüň beýik gudraty» atly «akylly» şäheriň ýeten belent derejelerini, gazanan üstünliklerini beýan edýän täze kitapça çapdan çykdy. Bu kitapça 10-11-nji sentýabr aralygynda paýtagtymyz Aşgabatda geçirilen «HI-TECH Türkmenistan — 2024» atly maýa goýum forumyna gatnaşyjylara gollanma hökmünde çap edildi.

* * *

24-nji sentýabrda Türkmenistanyň Halk Maslahatynyň mejlisinde Türkmenistanyň Prezidenti Arkadag şäherini 2024 — 2052-nji ýyllarda ösdürmegiň Konsepsiýasyny tassyklamak hakynda Permana gol çekdi. Ol Arkadag şäheriniň ähli ulgamyny sazlaşykly we durnukly ösdürmäge gönükdirilendir.

* * *

10-njy oktýabrda «Arkadag Binasynyň» meýdançasynda VI Wena baly geçirildi. Bu medeni çärä türkmen halkynyň Milli Lideri Gahryman Arkadagymyz hem gatnaşdy. Dost-doganlyk gatnaşyklarynda uly ähmiýete eýe bolan Wena baly 2023-nji ýylda hem Arkadag şäherinde geçirilipdi.

* * *

12-nji oktýabrda Aba Annaýew adyndaky Halkara atçylyk akademiýasynda «Ahalteke atçylyk sungaty we atlary bezemek däpleri» atly milli hödürnamanyň ÝUNESKO-nyň Adamzadyň maddy däl medeni mirasynyň sanawyna girizilendigi baradaky şahadatnamanyň gowşurylyş dabarasy geçirildi.

* * *

22 — 26-njy oktýabr aralygynda Türkmenistanyň Prezidentiniň Buýrugyna laýyklykda, Türkmenistanyň wekiliýetiniň agzalary Arkadag şäherini has-da ösdürmek bilen bagly Amerikanyň Birleşen Ştatlarynyň Waşington şäherinde gulluk iş saparynda boldular.

* * *

13 — 15-nji noýabr aralygynda geçirilen «Gorkut ata» atly IV halkara kinofestiwalynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň howandarlygynda surata düşürilen «Kompozitor» atly film festiwalyň eminler toparynyň ýörite baýragyna mynasyp boldy.

* * *

7-nji dekabrda Arkadag şäherinde türkmen halkynyň Milli Lideri Gahryman Arkadagymyzyň ýolbaşçylygynda geçirilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň mejlisinde gaznanyň işini kämilleşdirmek hakynda karar kabul edildi.

* * *

Dekabrda Arkadag şäheri Ýewropanyň Hil barlaglary boýunça jemgyýetiniň hil boýunça baýragyna, «Hil saýlawy — 2024» nyşany bolan «Diamond» derejesine mynasyp boldy hem-de Arkadag şäheriniň lukmançylyk klasteriniň önümleri haryt nyşanynyň Bütindünýä Intellektual Eýeçilik Guramasynyň Halkara býurosynyň degişli güwänamasy arkaly tassyklanyldy.

* * *

19-njy dekabrda Arkadag şäheriniň häkimliginde Türkmenistanyň Oguz han adyndaky Inžener-tehnologiýalar uniwersitetinde geçirilen «Akylly» şäher: dolandyrmak, sanly, «akylly» we emeli aň tehnologiýalary, howpsuzlygy, ykdysadyýeti» atly halkara ylmy-amaly maslahatyň çäklerinde daşary ýurt ýokary okuw mekdepleri hem-de kompaniýalary tarapyndan «akylly» şähere berlen şahadatnamalar gowşuryldy.

* * *

23-nji dekabrda Arkadag şäheriniň adybir futbol topary final duşuşygynda «Ahaly» 1:0 hasabynda ýeňip, Türkmenistanyň Kubogynyň eýesi boldy. Şol gün topar duşuşygyň geçirilen ýerinde ― paýtagtymyzyň «Aşgabat» köpugurly sport toplumynda milli çempionatymyzdaky çempionlygy üçin hem kubok bilen sylaglanyldy. Topar Türkmenistanyň Kubogyny bassyr ikinji gezek gazandy.