26-njy noýabrda Türkmenistanyň Ylymlar akademiýasynyň Halkara ylmy-tehnologiýa parkynda «Innowasiýalar, täze tehnologiýalar we olary önümçilige ornaşdyrmagyň meseleleri» atly III türkmen-hytaý ylmy-innowasion forumynyň açylyş dabarasy boldy. Hormatly Prezidentimiz Serdar Berdimuhamedowyň şu ýylyň oktýabrynda gol çeken degişli Kararyna laýyklykda geçirilýän bu çäre iki ýurduň arasynda ylmy-tehniki hyzmatdaşlygy has-da işjeňleşdirmek barada gazanylan ylalaşygy ýerine ýetirmäge gönükdirilendir.

Bu möhüm çärä Aşgabada gelen wekiliýet, ýagny Hytaý Halk Respublikasynyň ylym we tehnologiýalar ministriniň orunbasary hanym Lin Sin, şeýle-de dostlukly ýurduň ylmy-barlag merkezleriniň ýolbaşçylary, ylmy işgärleri, ýokary okuw mekdepleriniň professor-mugallymlary gatnaşdy.

Forumyň wekilleri şähergurluşyk ulgamynda innowasion konsepsiýalar baradaky çykyşlara aýratyn gyzyklanma bildirdiler. Bellenilişi ýaly, sebitde we ýurtda ilkinji «akylly» şäher bolan Arkadag şäheriniň gurulmagy yzygiderli durmuşa geçirilýän ägirt uly özgertmeleriň aýdyň nyşanydyr. Binagärlik we tehnologik çözgütler babatda bu täsin «akylly» şäher sanly ulgamy hem-de ýokary tehnologiýalary işjeň ornaşdyrmaga uly üns berýän Türkmenistanyň ykdysady taýdan kuwwatly döwletdigini dünýä äşgär edýär.