Gahryman Arkadagymyz Gurbanguly BERDIMUHAMEDOW:
— Arkadagly Serdarymyzyň tagallasy bilen durmuşa geçirilýän özgertmeler ykdysadyýetimizi ähli ugurlar boýunça ösdürmäge hem-de ägirt uly ösüşleri gazanmaga mümkinçilik berýär. 

Arkadagly Gahryman Serdarymyzyň Balkan welaýatyna sapary hakda

Toý tutumly Diýar. Munda gül günleriň gelşi başga. Wakalar wakalara ulaşýar, sepgitler sepgitlere sapýar. 2-nji noýabrda Balkanda dogan täze Gün hem öz berekedi bilen geldi. Ýurt Baştutanymyz Arkadagly Gahryman Serdarymyzyň mübärek gadamynyň düşmegi bilen bu gün Jeýhun bilen Bahry-Hazar arasy döwletli işlerden galkynýar. Deňiz tolkunýar, tolgunýar.

Birbada dört sany tutumly taryhy waka! Ikisi açylyş, ikisi düýbüni tutulyş. Türkmenbaşy etrabynda karbamid öndürýän toplumyň gurluşygynyň, Türkmenbaşy — Garabogaz — Gazagystan serhedi awtomobil ýolunyň Türkmenbaşy — Garabogaz böleginiň düýbüni tutmak hem-de Esenguluda agyz suwuny arassalaýjy desganyň we Garabogazköl aýlagynyň üstünden geçýän awtomobil köprüsiniň açylyşy bilen bagly dabaralar.

Düýbüni tutulyşlar bilen bagly toý meýdançasy Türkmenbaşy şäherinden beýle bir uzakda däl. Täze, kuwwatly tehnikalaryň hatary bu ýerde işleriň ilerlejekdiginde güwä. Başy iş başgaply gurluşykçylaryň göterilen göwnüne olaryň gollarynda pasyrdaýan baýdaklardan hem düşünip oturmaly. Işleriň depginli gitjekdigini diwarlardaky gurluşyga degişli suratlar hem aýdýar.

Aperin! Dört sany tutumly desganyň ähmiýeti, mümkinçiligi, döwrebaplygy sanasaň sogaby bar diýleni. Ýörite gurnalan mejlisler zalynda Türkmenistanyň at gazanan arhitektory hormatly Prezidentimiz çykyş etdi. Wakalar bilen gutlady. Esenguluda açylyşa gatnaşýan toý şatlykly mähelle-märeke şowhunly dabara bilen sanly ulgam arkaly göni aragatnaşyga çykdy. Halk bähbitli aladalar üçin Gahryman Arkadagymyza, döwlet Baştutanymyza tüýs ýürekden alkyşlaryny aýtdylar. Elbetde, Milli Liderimiziň aýdyşy ýaly, döwletiň bähbidi — halkyň bähbidi. Hormatly Prezidentimiz açylýan täze desga ak pata berýändigini aýdanda, zalda oturanlar hem ör turup, alkyşlara goşulyp, ýene bir gezek hoşallyklaryň üstüni ýetirdiler. Esenguludaky desga kuwwatlylygy gije-gündizde 20 müň kub metr bolan agyz suwuny arassalamaga niýetlenen. Deňiz suwuny arassalaýjy desganyň deňizýaka etrap üçin ähmiýeti uly. Geçen ýylyň özünde hem hormatly Prezidentimiziň gatnaşyp, iline serpaý etmeginde Aşgabatda, Ýaşlykda suw arassalaýjy desgalar ulanyşa berlipdi. Suw bilen ýaşaýyş gülleýär. Damjasyny altynyň dänesine deňeýän halk üçin suwuň gadyr-gymmaty başga. Bu täze açylan desga ýaşaýyş bolçulygynyň çeşmesidir.

Gezek Garabogaza geçdi. Gör-hä, bu gün Balkanyň ilersi-gaýrasy toýhana. Ruhubelentlikde küşt depip, gazal çekýärler. Döwri-döwrany wasp edýärler. Türkmenbaşy — Garabogaz — Gazagystanyň serhedine barýan awtomobil ýolunyň ugrunda gurlan döwrebap köpriniň açylyşyna guwanýarlar. Köpri — köpüň geçelgesi. Halkymyz köpe haýyrly işleri hem sogap hasaplaýar. Hatda köpriniň üstünde ýagşy arzuwlar edip, el galdyrmany mukaddeslik saýýar.

Bu gün köpüň dilegi köl boldy. Arkadagly Gahryman Serdarymyzyň ak pata bermeginde Garabogaz aýlagynyň üstünden geçýän umumy uzynlygy 354 metre, ini 21 metre barabar bolan täze köpri açyldy. Ol döwrebap derejede gurlupdyr. Derýalary, kölleri, mahlasy ýollary köpri bezeýär. Täze köpri hem halkara ulag geçelgeleri üçin ähmiýetli bolmak bilen, Türkmenbaşy, Garabogaz şäherlerini goňşy Gazagystan bilen birleşdirer. Täze awtomobil köprüsiniň dostlukly döwletleriň arasynda söwda, ulag, ýolagçy gatnawlarynyň gerimini giňeltjekdigi gürrüňsiz.

Golaýda hormatly Prezidentimiziň gatnaşmagynda Lebapda himiýa senagatyna degişli täze toplumyň düýbüniň tutulanyna ýaňy iki hepde töweregi bolandyr. Ynha, Balkanda öňki Garabogaz karbamid zawodynyň üstüni ýetirjek täze desganyň düýbi tutulýar. Ýurdumyzyň himiýa pudagynyň eksport mümkinçiliklerini has-da artdyrmak maksady bilen, hormatly Prezidentimiz täze desgany gurmak hakdaky Karara Türkmenistanyň Halk Maslahatynyň mejlisinde gol çekipdi. Bu toplumyň gurluşygyny Ýaponiýanyň «Mitsubishi Corporation» we Türkiýäniň «Gap Inşaat» kompaniýalarynyň konsorsiumy ýerine ýetirer. Onda bir gije-gündiziň dowamynda 2 müň tonna, ýylda bolsa 660 müň tonna ammiak öndüriler we ol çig mal hökmünde karbamid önümçiliginde peýdalanylar. Kärhanada bir gije-gündiziň dowamynda 3 müň 500 tonna, ýylda bolsa 1 million 155 müň tonna karbamid döküni öndüriler.

Taryhy gün köpriniň açylmagy bilen birlikde, ýol gurluşygynyň binýady hem tutuldy. Ol ýol dostluga uzaýan ýol. Türkmenbaşy — Garabogaz — Gazagystanyň serhedine barýan awtomobil ýolunyň umumy uzynlygy 207 kilometr. Ýurdumyzyň her bir künjegi sebit ýurtlary üçin hem dünýä çykalga. Türkmenistan Beýik Ýüpek ýolunyň ýüreginde ýerleşmek bilen, taryhy gatnawy iri halkalaýyn ýollara öwrüp, döwrebap derejede şöhratlandyrýar. Ýoluň gurluşygy «Altyn nesil» hojalyk jemgyýetine ynanyldy.

Hormatly Prezidentimiz: «Türkmenistan gurýan ýurtdur, kuwwatly döwletdir» diýýär. Gurluşyk we senagat işgärleriniň gününiň öňüsyrasynda Beýik işlerden degresi bereket tapan Balkan welaýatyndaky taryhy tutumly wakalar munuň durmuş ýüzündäki hakykatydyr.

Guwanç MÄMIÝEW.
«Arkadag» gazetiniň baş redaktory.