Eziz watandaşlar!

Hormatly adamlar!

Sizi gözel Diýarymyzda giňden we dabaraly bellenilýän milli baýram — Türkmenistanyň Garaşsyzlyk güni bilen tüýs ýürekden gutlaýaryn. Berkarar döwletiň täze eýýamynyň Galkynyşy döwründe biziň gazanýan ähli üstünliklerimiz, ýeňişlerimiz, berkararlygymyz hem-de bagtyýarlygymyz öz gözbaşyny milli buýsanjymyz bolan Garaşsyzlygymyzdan alyp gaýdýar. Şoňa görä-de, «Pähim-paýhas ummany Magtymguly Pyragy» ýylynda Garaşsyzlygymyzyň 33 ýyllygyna bagyşlanan ajaýyp baýramçylyk çäreleriniň, göwün galkyndyryjy wakalaryň eziz Watanymyza bolan söýgimizi, agzybirligimizi hem-de jebisligimizi has-da berkitjekdigine berk ynanýaryn.

33 ýyl mundan ozal Garaşsyz döwlet hökmünde dünýäde ykrar edilen Türkmenistanyň taryhyna bu gün şöhratly we ýeňişli sahypalar ýazylýar. Biziň her birimiziň durmuşymyzy düýpgöter özgerdýän maksatlarymyz hasyl bolýar, ýurdumyzy dünýäniň iň öňdebaryjy döwletleriniň hataryna çykarmakda täze belent sepgitlere ýetilýär. Her bir güni, her aýy, ýyly örän möhüm syýasy, ykdysady, medeni hem-de jemgyýetçilik wakalaryndan doly täze taryhy döwürde ata-babalarymyzyň jemgyýetimizi birleşdirýän milli döwleti döretmek baradaky arzuwlaryny goldanyp, demokratik, hukuk we dünýewi döwletimiziň binýatlaryny berkidýäris. Türkmenistany dünýäniň durnukly ösýän döwletleriniň birine öwürmek boýunça tapgyrlaýyn işleri amala aşyrýarys.

Merdana halkymyzyň ýaşaýyş-durmuşynyň derejesini we hilini ýokarlandyrmak, bäsdeşlige ukyply milli ykdysadyýeti döretmek boýunça oýlanyşykly, onýyllyklaryň dowamynda ýurdumyzy hemmetaraplaýyn ösdürmegi göz öňünde tutýan maksatnamalarymyzy üstünlikli durmuşa geçirýäris. Aşgabat, Arkadag şäherlerini, welaýatlarymyzy durmuş-ykdysady taýdan toplumlaýyn ösdürýäris. Diwersifikasiýalaşdyrmak we döwrebaplaşdyrmak arkaly ykdysadyýetimizi innowasion esasda ösdürmek üçin giň mümkinçilikleri döredýäris. Milli maksatnamalara laýyklykda alnyp barylýan giň gerimli gurluşyklar, dünýäniň iň kämil tehnikalary bilen enjamlaşdyrylan kärhanalarda öndürilýän ýokary hilli önümler, mähriban halkymyzyň durmuş üpjünçiliginiň, ýaşaýyş derejesiniň barha ýokarlanýandygyny tassyklaýan üstünliklerimiz ählimizi örän buýsandyryp, ylham-joşgun berýär, döredijilikli zähmete ruhlandyrýar.

Ýurdumyzy özgertmekde gazanan üstünliklerimizi, iň ýokary gymmatlygymyz bolan adamyň berkarar durmuşyny üpjün etmekde ýeten belent sepgitlerimizi bu gün bütin dünýä ykrar edýär. Biz Garaşsyzlygymyzyň 33 ýyllygyna gabatlap, döwrebap durmuş-medeni maksatly binalary açyp ulanmaga tabşyrdyk. Öz maýa goýum serişdelerimiziň hasabyna amala aşyrylýan uly möçberli taslamanyň — Türkmenistan — Owganystan — Pakistan — Hindistan gaz geçirijisiniň esasy tapgyry bolan Arkadagyň ak ýoly bilen Serhetabat — Hyrat gaz geçirijisiniň gurluşygyna badalga berdik. Şeýle hem ulag-kommunikasiýa, logistika desgalaryny açmak we düýbüni tutmak dabaralaryny ýokary derejede geçirdik. Munuň özi biziň milletimiziň ägirt uly ruhy galkynyşynyň, döwletimiziň gurplulygynyň aýdyň nyşanydyr.

Eziz watandaşlar!

Berkarar döwletiň täze eýýamynyň Galkynyşy döwründe ygtybarly, jogapkärli we ynamdar hyzmatdaş hökmünde Garaşsyz döwletimiziň halkara abraýy barha ýokarlanýar. Biziň dünýäde parahatçylygyň, ählumumy howpsuzlygyň, durnuklylygyň hemmetaraplaýyn pugtalandyrylmagyna gönükdirilen umumadamzat bähbitli başlangyçlarymyz halkara giňişlikde yzygiderli goldaw tapýar. Biz özara bähbitli gatnaşyklarymyzy giňeldip, eziz Watanymyzyň dünýä döwletleri hem-de halkara guramalar bilen syýasy-diplomatik, söwda-ykdysady, medeni-ynsanperwer ugurlar boýunça dostlukly, açyk we köpugurly hyzmatdaşlygyny hemmetaraplaýyn ösdürýäris. Bu ugurda abraýly halkara guramalar, aýratyn-da, Birleşen Milletler Guramasy bilen netijeli gatnaşyklary has-da işjeňleşdirýäris.

Hormatly adamlar!

Mukaddes Garaşsyzlygymyzyň 33 ýyllygynyň öňüsyrasynda ýokary derejede geçirilen Türkmenistanyň Halk Maslahatynyň mejlisinde gülläp ösýän Watanymyz, Garaşsyzlygymyz we Bitaraplygymyz, agzybirligimiz hem-de jebisligimiz barada öňe sürlen gymmatly taglymatlar ählimizi nurana geljegimiziň bähbidine belent maksatlara ruhlandyrýar. Garaşsyz, hemişelik Bitarap döwletimiziň dünýädäki abraýyny has-da ýokarlandyrmak, abadan we bagtyýar durmuşymyz üçin alyp barýan tutumly işlerimizi güýçli depginler bilen dowam etdireris. Watany söýmegiň berk binýatly däplerine, parahatçylyk, dostluk ýörelgelerimize, demokratik, hukuk we dünýewi döwleti gurmakdaky milli tejribämize daýanyp, ähli tagallalarymyzy dünýädäki ornumyzy mundan beýläk-de pugtalandyrmaga hem-de güýçlendirmäge gönükdireris.

Eziz watandaşlar!

Sizi Türkmenistanyň milli baýramy — mukaddes Garaşsyzlygymyzyň 33 ýyllygy bilen ýene-de bir gezek tüýs ýürekden gutlaýaryn. Siziň ähliňize berk jan saglyk, egsilmez bagtyýarlyk hem-de maşgala abadançylygyny arzuw edýärin. Goý, rowaçlyklaryň belentliklerine tarap ynamly öňe barýan Garaşsyz, hemişelik Bitarap Watanymyz mundan beýläk-de gülläp össün, onuň dünýädäki şan-şöhraty has-da belende galsyn!

Türkmenistanyň Prezidenti Serdar BERDIMUHAMEDOW.