Alp Arslan BEGENJOW,
Türkmen döwlet maliýe institutynyň talyby:

— Şu ýylyň sentýabr aýynda Ispaniýada erkin göreş boýunça 20 ýaşa çenli türgenleriň arasynda 79 kilogram agram derejesinde dünýä çempionatyna gatnaşyp, geçirilen bäş tutluşygymda garşydaşlaryma utuk bermän çempionlyk gazandym. Ýaryşda ýeňmek diňe güýç we çeýelik däl, eýsem, ruhy kuwwat, sabyr we ynam talap edýär. Ony başarandygyma, tugumyzy asmana galdyrandygyma buýsanýaryn. Ynha, maňa-da hormatly Prezidentimiziň Şa serpaýyna — «Toyota Camry V6» kysymly döwrebap awtoulag sowgadyna mynasyp bolmak bagty nesip etdi. Gahryman Arkadagymyzyň, Arkadagly Gahryman Serdarymyzyň biz — ýaş türgenlere bildirýän şeýle uly ynamlary jogapkärçiligimizi artdyrýar. Mundan beýläk-de Watanymyzyň sport abraýyny artdyrmakda gujur-gaýratymyzy gaýgyrmarys. Döredip berýän ajaýyp mümkinçilikleri üçin Gahryman Arkadagymyza, Arkadagly Gahryman Serdarymyza tüýs ýüregimden sagbolsun aýdýaryn.

Şahzadbek MATÝAKUBOW,
Türkmen döwlet bedenterbiýe we sport institutynyň talyby:

— Agyr atletika boýunça ýaşlaryň arasynda geçirilen halkara ýaryşa gatnaşyp dünýäniň çempiony adyna eýe boldum. Maňa hormatly Prezidentimiziň adyndan «Toyota Camry V6» kysymly ýeňil awtoulag sowgat berildi. Şa serpaýyna mynasyp bolmagym meniň begenjimi artdyrdy. Gün-günden netijeliligiňi ösdürmek, her bir agramlygy depäňe galdyrmak ýeňil däl. Ýöne üstünlik her gezek agramlygy galdyranyňda, özüňe garaýan ýüzlerçe adamlaryň ynamyny ödäniňde gelýär. Altyn medala eýe bolmagym diňe bir meniň gazanan ýeňşim däl, bu ýurdumyzyň, halkymyzyň üstünligidir.

Arkadagly Gahryman Serdarymyz «Ýaşlar — Watanyň daýanjy» diýip, biz — ýaşlara uly ynam bildirýär. Ýaş türgenlere şeýle mümkinçilikleri döredip berýän Gahryman Arkadagymyza, Arkadagly Gahryman Serdarymyza tükeniksiz alkyş aýdýaryn.