Öňňin paýtagtymyzdaky Türkmenistanyň Söwda-senagat edarasynda «Halkara ulag-üstaşyr geçelgeleri: özara arabaglanyşyk we ösüş — 2024» atly halkara maslahat we sergi açyldy.

Bütindünýä durnukly ulag gününe bagyşlanyp geçirilen halkara derejedäki bu giň möçberli çärede ata Watanymyzyň ulag we logistika pudagynyň soňky gazananlary tanyşdyryldy. Ýurdumyzyň ykdysady kuwwatynyň ýokary görkezijisine öwrülen, «akylly» şäher konsepsiýasy esasynda gurlan Arkadag şäheriniň bu sergidäki pawilýony köpleriň ünsüni çekdi. Bu sergide «akylly» şähere wekilçilik edýän Arkadag şäheriniň häkimliginiň maglumat howpsuzlygy we sanly tehnologiýalar bölüminiň baş hünärmeni Çerkez Annaýewiň beren gürrüňlerini okyjylara ýetirmegi makul bildik.

— Arkadag şäherinde döredilýän döwrebap şertleriň we mümkinçilikleriň ählisi adamlaryň bagtyýar durmuşyň hözirini görüp ýaşamaklaryna gönükdirilen. Şäherde ýolagçylara ýokary hilli hyzmat edýän elektrobuslaryň ýola goýlan gatnawlary hem-de elektromobilleriň hereketi, durmuş amatlyklary döwrüň talabyna doly laýyk gelýär. Ýene bir aýratyn bellemeli zadymyz «akylly» şäheriň şaýollarydyr köçeleriniň mümkinçilikleri. Bu barada hem täsin maglumatlary aýdyp bolar. Şaýollarda hem-de köçelerde ulaglaryň sazlaşykly hereketini gazanmakda wajyp ähmiýeti bolan sanly ulgamyň mümkinçiliklerinden peýdalanylýar.

Döwrümiziň ösüşine mynasyp goşant goşmaga, işlemäge döredip berýän giň mümkinçilikleri üçin Milli Liderimize hem-de hormatly Prezidentimize çäksiz alkyş aýdýaryn.